هذا يعزم وذاك يعزم من مطلع ومن اسفل وصاحبنا يمشي بلا ديره لابس الثوب وعباية السهرة والثاني مسكين يتخذ لف حامل الصحن والنشرة,لا ذه داري ولا الثاني كلهم مساكين يدورا الهبره, وكمان المعازيم كلهم مغرغيرن واستكثروا عليهم البطائق حتى البطائق اغلى منهم وجابوا ابوهم جرجار يتجرجروا يالله لهم ياذوب الشراب بقارورة..وقالها قبلي ابن السياري الدكتور بأنهم علُوا السقف بعد ماحسوا بان الشباب بالساحات وكل واحد معه شابوك والثاني معه بيلم ويقولوا يمين ودين ورب العالمين لو بعتوا شبر والا بعتوا السامان بيقع لكم فيها ومن اسفل و عاليها !! خلاص شعب الجنوب قد صحى ومعاد يلعب ,يا ويل من اشترى ومن باع ..ولعاد واحد منهم يقول انا معي اهلي بالباع ,حتى اهلهم كروعوا أبوتهم كرواع نزلوهم من فوق المنصات وقدام الخلق والناس بس الذي قده مصلٍب يشتي له بالراس بباكورة وإلا بضربة فأس..طبعا هم قدهم عملوا حسابهم وقاولوا نشتي التشاور بيننا بالخارج لعاد يكون في معازيم مهمين نسيناهم وهم يمثلوا الساحات ,اما نحن إلا جٍزًاع طريق وعابري سبيل لعاد نشتي عزائمكم ولا عاد نشتي العسيب ,,الناس مراعين وصابرين ويشوفوا ايش بنقول بيننا البين وبالغرف والخبر بيجيبوه الوراد ولو بعد حين..ذه شعب الجنوب صاحي ولعاد يجزع علوه شئي ,,حتى لو تكلمنا بعيد منوه ولو بالسوكيتي..ولعاد خلوا القادة الكبار عندهم من اصحاب زمان حد يلعبهم وقالوا لهم اول سدًوا, وبعدين العبوا ونحن وانتم بنشترح لما الصباح ..وذه اللي اقوله بالمختصر المفيد والذي يخالف القوم بيقع لبوه لبيج ولعاد تنفع بهررة ولا حتى خبيط.. قد الشباب هم سادتنا اليوم وهم منتشرين بالساحات و نحنا الا عبيد لبوتهم وهم هاماتنا.. اقول جلٍسًوا الديره سواء وصحصحوا وهم مراعين لكم ولعاد تنفع الخفسسه ولا حتى الهواز ,الله يخلي ماركو صاحب الفيس بوك ينقل الخبر من حافة الي حافة ويزيد يحاري ويزيد فوق الخبر بسباس..وانتم الشور شوركم والكلام شور وقول وان مرضوا الجماعة اوبهوا يزيدوا عليكم كما زادوا على الذي من قبلكم ,, وجابوا ابونا كبع وهم يضحكوا الناس قد فهموا اللعبة وانتم إلا جُدد وحسكم تكوروا كما كور الذي قبلكم .جلسوا بالكم وصحصحوا وانتبهوا وشوفوا الشابوك موجود وجاهز لكم ولهم..وذه الكلام بيننا ومش تقولوا محد قلنا ..وخليت الهدرة بالعدني عشان الكلام يفهمه القاصي والداني ,لان الهدرة بالعدني حالية لكل الناس الحاضر فيها والبادي, ,كلهم بيفدوا عدن بأرواحهم والنفوس ومهما حاولوا و كبروا العيشة و كثروا الفلوس .. ,, والسلام ختام,,